Возачот на Gresini Ducati, Фермин Алдегер, ќе мора да се подложи на хируршки зафат на десната рака откако доживеа низа падови за време на викендот на Големата награда на Индонезија.
Дваесет и едногодишниот Шпанец, кој минатата година токму на оваа патека ја оствари својата прва гран-при победа, имаше исклучително тежок викенд обележан со повреди и технички предизвици.
Проблемите за Алдегер започнаа уште во петокот, кога двапати излета од патеката, по што беше принуден да се бори низ квалификациите почнувајќи од Q1. Иако успеа да се пласира во Q2, во таа сесија повторно падна, но сепак успеа да обезбеди шеста стартна позиција. Неговиот настап на самата трка заврши предвреме, откако по одличниот старт и пробивањето до четвртото место, излета во свиокот 16 уште во вториот круг.
По завршувањето на трката, потврдено е дека Алдегер се здобил со фрактура на основата на првата метакарпална коска на десната рака. Шпанецот веднаш заминува за Барселона, каде што ќе биде опериран. Добра вест за него е паузата од две недели до следната трка, Големата награда на Австралија на патеката Филип Ајленд.
Оваа повреда е само последна во низата малери што го следат Алдегер во текот на оваа сезона. Тој речиси цела година се соочува со физички проблеми, откако уште на предсезонските тестирања ја скрши бутната коска, а подоцна во Асен заработи дополнителна повреда поради која мораше да пропушти три трки во текот на сезоната.
Коментари